ખૂબસૂરત હોય તે આવું કરાવે છે ફકત
જેવી રીતે ધ્યાન તું તારું ધરાવે છે સતત !
એક સાથે એક નહીં પણ બે ક્ષણો આબાદ થઇ
આપણે પાસે છીએ એવો મજાનો છે વખત !
નામ દીધાં વિણ હું પાડું સાદ તે સૌ સાંભળે
માત્ર એમાં તું મને આપે છે હોંકારો તરત !
તારી બાજુમાં છે એમ જ મારી બાજુમાં ય છે
કેટલા મૂશ્કેલીમાં મૂકે છે આપણને જગત !
હું મુલાયમ છું તો તું માસુમ છે એ વાતમાં
છે ભૂમિકા જેની ત્રીજા નંબરે તે છે સખત !
શેરીએ ઊભા રહી જોયા કરું છું આવ-જા
જે અહીંથી જાય છે તેઓ ય આવે છે પરત !
નામ તારું છે સરિતા એટલે વહી જાય છે
સ્થિર છું હું એથી મારું નામ રાખ્યું જડભરત !
- ભરત વિંઝુડા
Comments
Leave a Comment
khub saras gazal che.
wwaaahhh
શેરીએ ઊભા રહી જોયા કરું છું આવ-જા
જે અહીંથી જાય છે તેઓ ય આવે છે પરત !
નામ તારું છે સરિતા એટલે વહી જાય છે
સ્થિર છું હું એથી મારું નામ રાખ્યું જડભરત !
- વાહ જનાબ ! આ બંને શેર દાદુ થયા છે… મજા આવી…