નદી, પહાડ બધું છે અને તમે જ નથી,
તમારી પાસે ઘણું છે અને તમે જ નથી !
તમારી સાથે શરૂઆતમાં થયેલી તે,
હજી ય વાત શરૂ છે અને તમે જ નથી !
કરેલો ફૂલનો વરસાદ આપણાં ઉપર,
એ ગુલમહોર ઊભું છે અને તમે જ નથી !
નજીક જઈ અને જોયું તો ખાલી ખાલી છે,
આ કેમ દ્વાર ખૂલું છે અને તમે જ નથી !
બધાંને કહેતો ફરું છું કે મારા જીવનમાં,
તમે હતાં એ ખરું છે અને તમે જ નથી !
કદી ય એવું વિચાર્યું છે જઈને મંદિરમાં ?
તમારી સામે પ્રભુ છે અને તમે જ નથી !
- ભરત વિંઝુડા
