તને બોલાવું…

કાદવમાં ખીલ્યું એક કમળ તારી કૃપા છે
છે તે ય વળી ક્ષેમ કુશળ તારી કૃપા છે !

છે તારી કૃપા આભ ઉપર, ધરતી નીચે પણ
વચ્ચે ય અહીં સાવ અકળ તારી કૃપા છે !

ફેલાવ્યા વગર હાથ હથેળીમાં મળેલું
કંઇ ભાગ્ય રૂપે, એવી સરળ તારી કૃપા છે !

જળમાં હું લઇ નાવ અને ઘૂમી રહ્યો છું
રહી જાય જરા દૂર વમળ તારી કૃપા છે !

છે જીર્ણ ભીંતો ઘરની છતાં ઊભી અડીખમ
આ ઘરની ઉપર કેવી સબળ તારી કૃપા છે !

- ભરત વિંઝુડા

ખૂબસૂરત હોય તે આવું કરાવે છે ફકત
જેવી રીતે ધ્યાન તું તારું ધરાવે છે સતત !

એક સાથે એક નહીં પણ બે ક્ષણો આબાદ થઇ
આપણે પાસે છીએ એવો મજાનો છે વખત !

નામ દીધાં વિણ હું પાડું સાદ તે સૌ સાંભળે
માત્ર એમાં તું મને આપે છે હોંકારો તરત !

તારી બાજુમાં છે એમ જ મારી બાજુમાં ય છે
કેટલા મૂશ્કેલીમાં મૂકે છે આપણને જગત !

હું મુલાયમ છું તો તું માસુમ છે એ વાતમાં
છે ભૂમિકા જેની ત્રીજા નંબરે તે છે સખત !

શેરીએ ઊભા રહી જોયા કરું છું આવ-જા
જે અહીંથી જાય છે તેઓ ય આવે છે પરત !

નામ તારું છે સરિતા એટલે વહી જાય છે
સ્થિર છું હું એથી મારું નામ રાખ્યું જડભરત !

- ભરત વિંઝુડા

વેદ ઉપનિષદ ઋચાઓ શૂન્ય છે
શૂન્ય  લોકો, દેવતાઓ શૂન્ય છે

આખરે સઘળી કથાઓ  શૂન્ય છે
ઊઠતા શ્રોતા, સભાઓ શૂન્ય છે

શૂન્યતાનું છે કવચ એનાં  ઉપર
આ હવાઓ, વાયરાઓ શૂન્ય છે

આંગળી  ચીંધી બતાવું  છું  તને
તે પછી આગળ દિશાઓ શૂન્ય છે

જે  લખાતું  એ  ભુસાતું  હોય છે
સૃષ્ટિની સઘળી કલાઓ શૂન્ય છે

જન્મ મૃત્યુ જન્મ મૃત્યુ જન્મ ને
તે પછીની શક્યતાઓ શૂન્ય છે

હો  કયામત કે પ્રલય જેવું કશું
બાદ સઘળી કલ્પનાઓ શૂન્ય છે 

- ભરત વિંઝુડા

રાતના કંઇ વિચાર આવે છે
જાતના કંઇ વિચાર આવે છે !

તેં કહી’તી મને અધૂરી તે
વાતના કંઇ વિચાર આવે છે !

આજને મેં અનુભવી જ નથી
કાલના કંઇ વિચાર આવે છે !

એક પથ્થરને જોઉં છું ત્યારે
કાચના કંઇ વિચાર આવે છે !

માત્ર તારા અને ફકત તારા
નામના કંઇ વિચાર આવે છે !

હર વિષયમાં કેમ ઊંડો જાઉં નહીં ?
હું  હ્રદયમાં  કેમ  ઊંડો જાઉં નહીં ?

કેટલા  યુગો  વીત્યા  કોને  ખબર
એ  સમયમાં  કેમ ઊંડો જાઉં નહીં ?

આપણી નજરો  મળી ગઇ છે  હવે
ને  પ્રણયમાં  કેમ  ઊંડો જાઉં નહીં ?

છંદ તારા સમજું  એ  કરતા  વધુ
મારા લયમાં  કેમ ઊંડો જાઉં નહીં ?

મારી  ઉંમર  જેવડી  લઇને  તરસ
તારી  વયમાં  કેમ ઊંડો જાઉં નહીં ?

સામસામે આવી જોવું  જોઈએ
જાતને અટકાવી જોવું  જોઈએ

આંખ પહેલા કોની ઝૂકી જાય છે
દેખવું અજમાવી જોવું  જોઈએ

હું  તને ચાહું  ને તું  ચાહે મને
દિલ હવે બદલાવી જોવું જોઈએ

માણસો સમજે  નહીં  તો  આખરે
મનને પણ સમજાવી જોવું જોઈએ

સ્વપ્ન ઊડી  જાય તે ચાલે નહીં
આંખમાં દફનાવી જોવું  જોઈએ

તું   કહે  કે જોઈએ  છે આ મને
એ જ મારે લાવી  જોવું  જોઈએ

હોય  ભીતરમા તો  હોંકારો ય દે
બારણું  ખખડાવી  જોવું  જોઈએ

પ્રેમ  કરવાનો તું પ્રયાસ ન કર
આ જગતને વધુ  ઉદાસ ન કર

તું  મને  શોધ  સામી  છાતીએ
પીઠ પાછળ બહુ તપાસ ન  કર

દૂર તું  ને  નજીક  પણ  તું  છે
બે જગાએ સતત નિવાસ ન કર

એક  એને નિહાળીએ  તો બસ
એટલાથી  વધુ  ઉજાસ ન  કર

આમ  હર પળ મને  મિટાવીને
ખાલીપાને ય તું ખલાસ ન કર